♪ “မြို့ပြမှာသွားလာရေး အဆင်ပြေစေဖို့” ♫

လူတိုင်းနီးပါးသည် အကြောင်းအမျိုးမျိုးကြောင့် နေ့စဉ်အိမ်ပြင်ထွက်၍ သွားလာလှုပ်ရှားကြရပါသည်။ သို့သော်အလုပ် ပိတ်ရက်၊ နားရက်များမှာတော့ တစ်နေ့လုံးအိမ်မှာပဲနေ၍ အချိန်ကုန်သောသူများလည်းရှိပါသည်။ သာမန် နေ့စဉ်ဘ၀များမှာတော့ စားဝတ်နေရေးအတွက် ပေတစ်ရာ လမ်းမများပေါ် သွားလာလှုပ်ရှားသူများစွာ ရှိနေပါသည်။ ထိုသို့နေရာမျိုးစုံသို့ သွားလာ လှုပ်ရှားသည့်အခါ သက်ဆိုင်ရာသယ်ယူပို့ဆောင်ရေး ယာဉ်များကို အားကိုး အားထားပြုရပါသည်။ ခေတ်မီမြို့ပြတစ်ခုအတွက် သယ်ယူပို့ဆောင်ရေး ကဏ္ဍမှာလည်း အရေးကြီးရာနည်းပညာဆန်းသစ်တီထွင်မှုအရ သယ်ယူ ပို့ဆောင်ရေးယာဉ်များသည်လည်း ပိုမိုကောင်းမွန် လာကြပါသည်။ လူဦးရေ သိပ်သည်းသောမြို့များတွင် ကား၊ ရထား၊ သဘောင်္စီးဖို့အတွက်သည်ပင် တစ်ခါတစ်ရံ စိတ်ဒုက္ခဖြစ်ကြရပါသည်။ နေ့စဉ်ရုံးတက်၊ ရုံးဆင်းဖို့အတွက် သွားလာရေးယာဉ်များပေါ်တွင် အချိန် များစွာကုန်ဆုံးကြရပါသည်။ နိုင်ငံအသီးသီးမှ သက်ဆိုင်ရာတာဝန်ရှိသူများ၊တတ်သိပညာရှင်များ၊ နည်းပညာရှင်များကတော့ သွားလာရေးနှင့် သယ်ယူ ပို့ဆောင်ရေးကဏ္ဍ အဆင်ပြေစေရန်နည်းအမျိုးမျိုး အသုံးပြုကြပါသည်။ တိုးတက်သော နိုင်ငံ များတွင် မြေပေါ်မြေအောက်လမ်း များဖောက်လုပ်၍ အမြန်ရထားများ စီးနိုင်ရန် လုပ်ဆောင်ပေးထားပြီး၊ ကားများလျင်မြန်စွာသွားလာနိုင်ရန် အတွက်လည်း နှစ်ထပ်၊ သုံးထပ်လမ်းများ ဖောက်လုပ်ပေးထားပါသည်။ သို့သော် ယာဉ်ကြောပိတ်ဆို့မှုများကတော့ နေရာအလိုက်ရှိနေဆဲဖြစ်ပါသည်။

မိနစ်ပိုင်းအတွင်း သွားလာနေသောအမြန်ရထားများ၊ Bus များ ရှိသော်လည်း စီးနင်းသူအားလုံးနီးပါးမှာ အလျင်လိုကြသော ကြောင့် ရုံးတက်၊ ရုံးဆင်းချိန် များတွင် မတ်တပ်ရပ်လိုက်ပါဖို့အတွက်ပင် ကြိုးစားကြရပါသည်။ ထို့ကြောင့် ရုံးတက်၊ ရုံးဆင်းချိန်များ တွင် စီးနင်းသူများအား လမ်းညွှန်ထိန်းကျောင်း နိုင်ရန် ၀န်ထမ်းများခန့်အပ်ထားခြင်းမျိုးလည်း ရှိတတ်ပါသည်။ ရထား ထွက်ခွာခါနီး အလျင်အမြန်မတက်စေရန်၊ ၀င်ဆံ့သည့် ပမာဏထက် ကျော်လွန်၍ စီးနင်းမှုမရှိစေရန်စသည်တို့အတွက် စောင့်ကြည့်ပေးတတ် ကြပါသည်။ Bus များစီးနင်းသည့် အခါတွင်လည်းခရီးသည်များအဆင်ပြေ စေရန်ဆောင်ရွက်ပေးထားကြပါသည်။ သက်ကြီး ရွယ်အိုများနှင့် မသန်စွမ်း များထိုင်နိုင်ရန် ဦးစားပေးထိုင်ခုံများသတ်မှတ်ထားသလို၊ ကားအတက် အဆင်း အဆင်ပြေစေရန် ခြေ နင်းခုံများတွင်လည်း ခေတ်မီနည်းပညာများ တပ်ဆင်ပေးထားကြပါသည်။ တစ်ထပ် Bus များရှိသလို၊ နှစ်ထပ် Bus များလည်း ရှိပါသည်။ အပေါ်ထပ်တွင် လူဦးရေမည်မျှ စီးနင်းနိုင်ကြောင်း၊ နေရာမည်မျှ လွတ်နေသေးကြောင်းကိုလည်းကားအတက်အဆင်း နေရာတွင် LED ဘုတ်ဖြင့် ကြေညာပေးကြပါသည်။ သယ်ယူပို့ဆောင်ရေးကဏ္ဍတွင် Taxi (အငှားကား)စီးခြင်းမှာ Bus စီးခြင်း၊ မြေ အောက်ရထားစီးခြင်းထက် ငွေကုန် ကြေးကျများသောကြောင့် နေ့စဉ်သွားလာရေးအတွက် အားထားရန် ခက်ခဲ ပါသည်။

ထို့ကြောင့်အချို့သော နိုင်ငံများတွင်မြို့ပြ၏ အရေးကြီးနေရာများဖြစ်သော မြို့တွင်းနှင့် လေဆိပ်လမ်းတစ်လျှောက်ကို မြေအောက် ရထားဖောက်လုပ် ပေးခြင်း၊ Bus ပြေးဆွဲပေးခြင်းတို့အား လုပ်ဆောင်ပေးထားပါသည်။ လေဆိပ် များတွင် Bus ၊ အငှား ကား၊ မြေအောက်ရထားစသည်ဖြင့် သွားလာရေး အထောက်အကူပြုယာဉ်မျိုးစုံကို ဖန်တီးပေးထားခြင်းသည် အကောင်းဆုံးပါ။ ခရီးသည် စိတ်ကြိုက်ရွေးချယ်စီးနင်းနိုင်သောကြောင့် နိုင်ငံ၏အ၀င်ပေါက်ဟာ မျက်နှာပန်းလှမှာဖြစ်ပါသည်။အငှားကားစီးခြင်းသည်ခရီးစရိတ်ပိုမို ကုန်ကျ သော်လည်း အလေး အပင်ဝန်စည်စလွယ်များနဲ့ဆိုပါက အငှားကားများကို သာ အားထားကြရပါသည်။ လူအများနဲ့ တိုးကြိတ်စီးစရာမလိုဘဲ သက်သောင့် သက်သာဖြင့် ဟန်ကျကျစီးနိုင်သောကြောင့်လည်း အငှားကားများအား စီးနင်းသူများဆဲဖြစ်ပါသည်။ ရုတ်တရက်မိုးရွာသည့်အခါ၊ ပွဲလမ်းသဘင် များရှိသည့်အခါမျိုးတွင် အငှားကား ငှားစီးဖို့ မလွယ်ကူနိုင်ပါဘူး။ နည်းပညာ များတိုးတက်လာသည့်အခါ အငှားကားငှားစီးရန် ပိုမိုအဆင်ပြေလာပါသည်။ မိမိရှိ စမတ်ဖုန်းများ၊ နည်းပညာပစ္စည်းများကိုအသုံးပြု၍ အငှားကားများကို မိမိရှိရာသို့ လာကြိုခိုင်းနိုင်ပါသည်။ သယ်ယူပို့ဆောင်ရေးအား ၀န်ဆောင်မှု ပေးသည့်ကုမ္ပဏီများသည်နာမည်ကျော်၊ အမြတ်ရခြင်းကြောင့် ရင်းနှီးမြှုပ်နှံ သူများပြားကာ၊ အလားတူ ၀န်ဆောင်မှုပေးသော လုပ်ငန်းများလည်း အပြိုင် အဆိုင်ထွက်ပေါ်လာပါသည်။

နာမည်ကျော်နည်းပညာကုမ္ပဏီကြီးဖြစ်သော Apple သည်လည်း သယ်ယူပို့ ဆောင်ရေးဝန်ဆောင်မှုပေးသော ကဏ္ဍတွင်ရင်းနှီးမြှုပ်နှံပြီဖြစ်ပါသည်။ Apple ဟာ တရုတ်နိုင်ငံမှ အငှားယာဉ်ဝန်ဆောင်မှုပေးသော Didi Chuxing လုပ်ငန်း တွင်ဒေါ်လာ 1 billion ရင်းနှီးမြှုပ်နှံမှာဖြစ်ပါသည်။ Didi Chuxing ကို Didi Kuaidi, Didi Dache ဟူ၍လည်းခေါ်ဆိုခဲ့ကြပါသည်။ ရုံးချုပ်မှာ ဘေဂျင်းတွင် တည်ရှိပြီး၊ တရုတ်ပြည်မနေရာအတော် များများကို ၀န်ဆောင်မှုပေးပါသည်။ ၂၀၁၂ ခုနှစ်၊ ဇွန်လကတည်ထောင်ခဲ့ခြင်းဖြစ်ပြီး၊ တည်ထောင်သူနှင့် CEO မှာ Cheng Wei ဖြစ်ကာ၊ President မှာ Liu Qing ပါ။ တည်ထောင်သူ Cheng Wei ဟာ တရုတ်နိုင်ငံ၏နာမည်ကျော် အွန်လိုင်းအရောင်းအ၀ယ် ကုမ္ပဏီကြီး ဖြစ်သော Alibaba တွင်လည်း ရှစ်နှစ်ခန့် အလုပ်လုပ်ခဲ့ပါသည်။ Didi Chuxing တွင် လုပ်ကိုင်နေသော အလုပ်သမား အများစုမှာ လူငယ်နှင့် လူလတ်ပိုင်း အရွယ်တို့ဖြစ်ပါသည်။ Didi Chuxing တွင် အငှားကားဝန်ဆောင်မှု တစ်မျိုး တည်းသာ ရရှိနိုင်ခြင်း မဟုတ်ဘဲ၊ ကိုယ်ပိုင်သီးသန့်ကားများလည်း ငှားနိုင် ပါသည်။ မြို့ကြီးအချို့တွင် Didi Bus များဖြင့်လည်း ၀န်ဆောင်မှုပေးနေ ပါသည်။

Apple CEO Tim Cook အနေဖြင့် တရုတ်နိုင်ငံတွင်ဈေးကွက်ချဲ့ထွင်လိုခြင်း၊ ရင်းနှီးမြှုပ်နှံလိုခြင်းမှာ အစဉ်သဖြင့်ဖြစ်ပေါ် နေသောစိတ်ဝင်စားမှုဖြစ်ပါ သည်။ ယခုအခါ Didi တွင် ရင်းနှီးမြှုပ်နှံခြင်းမှာလည်း အကြောင်းအရင်း များစွာရှိနိုင်သော်လည်း ထိုထဲမှအချက်တစ်ချက်မှာ တရုတ်နိုင်ငံ၏ ဈေးကွက် အနေအထားကို လေ့လာခွင့်ရရှိလိုခြင်းဖြစ်ကြောင်း နည်းပညာဆောင်းပါး များ ရေးသားသည့် Benjamin Kerry & Gavin Lenaghan ကမှတ်ချက်ပြု ပါသည်။ "Tim Cook ဟာ ထူးခြားတဲ့ ခေါင်းဆောင် တစ်ယောက်ပါ။ Didi လုပ်ငန်းဟာ အခုလို Apple နဲ့ပူးပေါင်း လုပ်ဆောင်ရတဲ့အတွက်လည်း ခံစားချက်အရမ်းကောင်းပါတယ်”ဟု Didi ရဲ့ president ဖြစ်သူ Liu က Bloomberg ရဲ့မေးမြန်းမှုမှာဖြေကြားခဲ့ပါသည်။ Didi ရဲ့ဝန်ဆောင်မှုကို ရယူ နေသူ အရေ အတွက်ဟာ နေ့စဉ်တိုင်းတွင် သန်းချီရှိနေပြီး၊လုပ်ငန်းတူညီ သော Uber နဲ့လည်း ယှဉ်ပြိုင်နိုင်ပါ သည်။ Apple ရဲ့ ယခုလို ရင်းနှီး မြှုပ်နှံမှု ဟာ Uber နဲ့ပိုမိုယှဉ်ပြိုင်နိုင်စေဖို့ အထောက်အကူဖြစ်စေပါသည်။ သတင်း ထွက်မှုကြာနေပြီဖြစ်သော Apple ရဲ့ ကားစီမံကိန်းဟာအခုလို Didi နဲ့ ပူးပေါင်းမှုနောက်တွင် ပိုမိုမျှော်လင့်နိုင် သောအနေအထားဖြစ်လာပါသည်။ ပထမဆုံး Apple car သည် electric အမျိုးအစားဖြစ်မည်ဟုလည်း နည်းပညာ အရေးသုံးသပ်သူများက ခန့်မှန်းကြပါသည်။ နည်းပညာစနစ်ဆန်းများ၊ ပစ္စည်း များကို ၀ယ်ယူသုံးစွဲသူများသည် Apple ရဲ့ကားသတင်းကိုသာမက အခြား နည်းပညာကုမ္ပဏီများ၏ ကားထုတ်လုပ်မည့် ကိစ္စများကို ပါစိတ်ဝင်စားကြ ပါသည်။

မောင်းသူမဲ့ကားသတင်းများကတော့ စိတ်ဝင်စားမှုအခံရဆုံးဖြစ်ပါသည်။ မောင်းသူမဲ့ကား များဟာ စင်ကာပူသို့ပင်ခြေဆန့်နိုင်ခဲ့ပြီဖြစ်ပါသည်။ မောင်းသူမဲ့ အငှားယာဉ်များအစပြုမှုရှိခဲ့ပြီး၊ မောင်းသူမဲ့ bus များအထိပါ ကြိုးပမ်းဆောင်ရွက်နေကြပါသည်။ အငှားကားငှားစီးသည့်အခါ ပိုက်ဆံ ပေးချေမှုလွယ်ကူစေရန် ကတ်စနစ်နှင့် အခြားငွေပေးချေမှုဆိုင်ရာ ၀န်ဆောင်မှု ပေးသော စနစ်များကို အသုံးပြုနိုင်ပါသည်။ စမတ်ဖုန်း၊ စမတ်နာရီတို့မှတစ်ဆင့် ကားခပေးချေနိုင်သောကြောင့် ဖုန်းကုမ္ပဏီများ၊ ငွေပေးချေမှုဆိုင်ရာ ၀န်ဆောင်မှုပေးသောလုပ်ငန်းများနှင့် အငှားကား ၀န်ဆောင်မှုပေးသောကုမ္ပဏီများပိုမို၍ အပြန်အလှန် အကျိုးပြုနိုင်ပါသည်။ သွားလာရေးကိစ္စများတွင်ဝေဟင်မှ ပျံဝဲသော ယာဉ်များသည်လည်း အထောက်အပံ့များစွာပေးပါသည်။ တန်ဖိုး သက်သာသောလေကြောင်းလိုင်း များကြောင့် ခရီးသွားဦးရေပိုမိုတိုးတက်လာခဲ့ပါသည်။ အရေးပေါ်ကုသရမည့် လူနာများ အချိန်မီဆေးရုံသို့ ရောက်ရှိရန်အတွက်နှင့်အခြား အကြောင်းအရာ များအတွက် ရဟတ်ယာဉ်ရပ်နားနိုင်မည့်ကွင်းများအား ဆေးရုံ နှင့် ခေတ်မီ မိုးမျှော်တိုက်ကြီးများတွင် ထည့် သွင်းတည်ဆောက်ထားကြပါသည်။

ပြီးခဲ့သောနှစ်က မိတ်ဆက်သွားခဲ့သော တစ် ယောက်စီးနင်းနိုင်သော Drone သည်လည်း ပရိသတ်စိတ်ဝင် စားမှုရရှိခဲ့ပါသည်။ အဆိုပါ Ehang 184 drone ကြောင့် သယ်ယူ ပို့ဆောင် ရေးကဏ္ဍတွင် Drone များကိုစဉ်းစားလာခဲ့ကြ ပါသည်။ ကားများဟာ သွားလာရေးအတွက် အဆင်ပြေစေသော်လည်း မီးခိုး ထုတ်လွှင့်မှုအပိုင်းနှင့် လောင်စာသုံးစွဲမှုအပိုင်းတွင် ပြဿနာရှိသောကြောင့် သဘာဝမှရရှိသောစွမ်းအင်ကို အသုံးပြုနိုင် အောင်လည်း ကြိုးပမ်းနေကြပါ သည်။ ဆိုလာ စနစ်မှရရှိသော လျှပ်စစ်ဓာတ်ကိုကားများတွင် အသုံးပြုနိုင် အောင်တီထွင်ခြင်းဖြစ် ပါသည်။ လောင်စာဆီသုံးကားများနေရာတွင် လျှပ်စစ်ကားများ ခေတ်စားပါက အိမ်မှာပင်ဖုန်းအားသွင်းသလို၊ အားသွင်း၍ မောင်းနှင်နိုင်ပါမည်။ မြို့ကိုရစ်ခွေစီးဆင်းနေသည့် မြစ်ချောင်းများရှိသော နိုင်ငံများအတွက် ရေယာဉ်များကိုလည်းသယ်ယူ ပို့ဆောင်ရေး အပိုင်းတွင် အင်အား တစ်ရပ်အဖြစ်သုံးစွဲနိုင်ပါသည်။ နေ့စဉ်လှုပ်ရှားသွားလာနေရသော သူများအတွက် ဘေးအန္တရာယ်ကင်းရှင်းရေးမှာအဓိကအရေးအကြီးဆုံး ဖြစ်ပါသည်။ မောင်းနှင်သူ တစ်ဦးကြောင့် လိုက်ပါစီးနင်းသူပေါင်းများစွာ ဒုက္ခရောက်ရသည် သာမက ကျန်ရစ်သည့်မိသားစုဝင်များအတွက်ပါ အပူသောကများစေပါသည်။ ခရီးသွားဟန်ဆောင်ထားသော ဒုစရိုက်သမား များ၊ ကားတိုက်ခံရဟန်ဆောင်ကာ လျော်ကြေးတောင်းသူများကြောင့်လည်း ကောင်းမွန်သော အသက်မွေးဝမ်းကျောင်းပြုနေ သည့် အငှားယာဉ်မောင်း များ ဒုက္ခရောက်ကြရပါသည်။ တိုးတက်သောခေတ်မှာ ပို့ဆောင်သူနှင့် လိုက်ပါစီးနင်းသူတို့ကြား အပြန်အလှန်သတိထားခြင်းများလည်း ပိုတိုး လာပါသည်။

ငြိမ်းချမ်းတိုး

Mobile Guide Journal (Every Monday)
https://www.facebook.com/officialmobileguidejournal

<<< အောက်ကကြော်ငြာကိုတစ်ချက်လောက်နှိပ်ခဲ့ပေးစေချင်ပါတယ်ဗျာ။ ကျွန်တော့်ကိုတစ်ဖက်တစ်လမ်းကကူညီရာရောက်ပါတယ်ဗျာ။ >>>  






Download




www.pyaephyo.com